议员心痛七警望特首特赦 黎栋国：司法程序未完

　　图：就七警被囚事件，早前警察两个协会举行特别会员大会商讨事件

　　因为“占领行动”期间备受重大压力，加上挑衅而不当对待被捕人士嘅七位警员早前被法庭判囚两年，而家正在上诉当中。民建联立法会议员蒋丽芸（Ann姐）寻日就喺立法会提口头质询话，有意见指出，有唔少参与“占领运动”嘅年轻人系为咗追求理想而误堕法网，亦有小部分执法人员因为被挑衅而被定罪，问政府会唔会考虑按基本法授权行政长官嘅权力，考虑特赦或者减免部分人嘅刑罚。

　　黎栋国：司法程序未完

　　除咗Ann姐，民建联主席李慧琼（Starry）、同属民建联嘅葛珮帆（EQ）同经民联嘅梁美芬（Pricilla）等建制派议员亦纷纷发言希望政府考虑特赦，为相关人士求情。

　　不过，保安局局长黎栋国就解释，行政长官嘅特赦权力同特赦方式自回归后有所改变，同以前港督按英皇制诰嘅特赦唔同。现时行政长官分别以三种唔同方法，分别系按“长期监禁刑罚覆核委员会”嘅建议作出减刑决定、由医生认为囚犯身体条件因为唔同因素不宜收监、或者在囚人士向行政长官提出呈请获得接纳。

　　黎栋国话，行政长官会就每宗个案独立作出审慎详细考虑，另外，七名警员而家已经全部上诉，喺所有司法程序未完结之前，政府唔会就个别案件作出评论，行政长官亦唔会行使赦免或减轻刑事罪犯嘅刑罚嘅职权。